پنجاب میں بارشوں کا نیا الرٹ، متعدد اضلاع میں موسلادھار بارش کا امکان

پنجاب میں بارشوں کا نیا الرٹ، متعدد اضلاع میں موسلادھار بارش کا امکان

لاہور: پنجاب میں مون سون بارشوں کے نئے سلسلے کے پیش نظر صوبائی ڈیزاسٹر مینجمنٹ اتھارٹی (PDMA) نے متعلقہ اداروں کو الرٹ رہنے کی ہدایت کردی ہے۔ محکمہ موسمیات کے مطابق 3 سے 5 ستمبر کے دوران پنجاب کے مختلف اضلاع میں بارش، گرج چمک اور تیز ہواؤں کا امکان ہے۔

پی ڈی ایم اے کے مطابق راولپنڈی، مری، گلیات، جہلم، چکوال، تلہ گنگ، اٹک، سیالکوٹ، نارووال، منڈی بہاؤالدین، گجرات، گوجرانوالہ، حافظ آباد، وزیرآباد، لاہور، قصور اور اوکاڑہ میں بارش متوقع ہے۔

اسی طرح 4 اور 5 ستمبر کے دوران فیصل آباد، جھنگ، ٹوبہ ٹیک سنگھ، لیہ، بھکر، ساہیوال، پاکپتن، بہاولنگر، بہاولپور اور ڈیرہ غازی خان سمیت دیگر علاقوں میں بھی بارش کا امکان ظاہر کیا گیا ہے۔

محکمہ موسمیات کے مطابق پنجاب کے بعض علاقوں میں شدید بارش کے باعث شہری سیلاب (اربن فلڈنگ) کا خطرہ پیدا ہوسکتا ہے۔ لاہور، راولپنڈی، گوجرانوالہ اور فیصل آباد جیسے بڑے شہروں میں نشیبی علاقوں پر خصوصی توجہ دینے کی ہدایت کی گئی ہے۔

پی ڈی ایم اے نے مری، گلیات اور دیگر پہاڑی علاقوں میں بارش کے دوران لینڈ سلائیڈنگ کے خطرے کے پیش نظر ضلعی انتظامیہ کو ضروری اقدامات مکمل رکھنے کی ہدایت کی ہے۔ برساتی نالوں میں اچانک پانی بڑھنے اور فلیش فلڈ کے خدشے کے باعث بھی متعلقہ اداروں کو الرٹ رہنے کا کہا گیا ہے۔

ڈی جی پی ڈی ایم اے نے صوبے کے کمشنرز اور ڈپٹی کمشنرز کو ہدایت کی ہے کہ ممکنہ ہنگامی صورتحال سے نمٹنے کے لیے انتظامات مکمل رکھے جائیں۔ محکمہ صحت، آبپاشی، تعمیر و مواصلات، لوکل گورنمنٹ، لائیو اسٹاک اور دیگر متعلقہ اداروں کو بھی ضروری احتیاطی اقدامات کی ہدایت کی گئی ہے۔

پی ڈی ایم اے نے شہریوں سے اپیل کی ہے کہ خراب موسم کے دوران غیر ضروری سفر سے گریز کریں، بوسیدہ اور کچے مکانات میں رہائش اختیار نہ کریں اور گرج چمک کے دوران کھلے مقامات پر جانے سے احتیاط کریں۔

حکام نے والدین کو بھی ہدایت کی ہے کہ بارش کے پانی، برساتی نالوں، بجلی کے کھمبوں اور تاروں کے قریب بچوں کو جانے سے روکیں۔ کسی بھی ہنگامی صورتحال میں شہری پی ڈی ایم اے ہیلپ لائن 1129 سے رابطہ کرسکتے ہیں۔

محکمہ موسمیات کا موجودہ پنجاب الرٹ بھی 5 ستمبر تک شدید بارش اور بعض علاقوں میں اربن فلڈنگ کے خطرے کی نشاندہی کرتا ہے۔