پاکستان نے ریکارڈ 3 ارب ڈالر کا یورو بانڈ حاصل کرلیا
اسلام آباد: پاکستان نے عالمی مالیاتی مارکیٹ میں بڑی پیش رفت کرتے ہوئے 3 ارب ڈالر کا ڈوئل ٹرانچ یورو بانڈ کامیابی سے جاری کر دیا ہے، جسے ملکی تاریخ میں ایک ہی لین دین کے ذریعے سب سے بڑا بین الاقوامی بانڈ اجرا قرار دیا جا رہا ہے۔
وزارت خزانہ کے مطابق پاکستان کی جانب سے جاری کیے گئے یورو بانڈ کے لیے عالمی سرمایہ کاروں کی جانب سے تقریباً 6 ارب ڈالر کے آرڈرز موصول ہوئے، جو جاری کیے گئے بانڈ کی مالیت سے تقریباً دو گنا ہیں۔ سرمایہ کاروں کی یہ دلچسپی پاکستان کی عالمی کیپٹل مارکیٹ میں دوبارہ بڑھتی ہوئی رسائی اور سرمایہ کاروں کے اعتماد کی عکاسی کرتی ہے۔
تفصیلات کے مطابق پاکستان نے 1.75 ارب ڈالر مالیت کا ساڑھے پانچ سالہ یورو بانڈ 7.50 فیصد کوپن ریٹ پر جاری کیا، جبکہ مزید 1.25 ارب ڈالر کا 10 سالہ یورو بانڈ 7.90 فیصد کوپن ریٹ پر جاری کیا گیا۔ یوں دونوں ٹرانچز کے ذریعے مجموعی طور پر 3 ارب ڈالر حاصل کیے گئے۔
وزارت خزانہ کا کہنا ہے کہ بانڈ میں ایشیا، مشرق وسطیٰ، یورپ اور امریکا سمیت مختلف خطوں کے ادارہ جاتی سرمایہ کاروں نے دلچسپی ظاہر کی۔ حکومت کے مطابق سرمایہ کاروں کی وسیع شرکت پاکستان کی معیشت اور مستقبل کی سمت پر عالمی اعتماد میں بہتری کا اشارہ ہے۔
وفاقی وزیر خزانہ محمد اورنگزیب نے بھی 3 ارب ڈالر کے یورو بانڈ اجرا کو مثبت پیش رفت قرار دیتے ہوئے کہا کہ یہ لین دین پاکستان کی تاریخ میں سب سے بڑا ہے اور عالمی ریٹنگ ایجنسیوں کی جانب سے پاکستان کی کریڈٹ ریٹنگ میں بہتری کے بعد عالمی سرمایہ کاروں کے اعتماد کی عکاسی کرتا ہے۔
حکومت کے مطابق یورو بانڈ سے حاصل ہونے والی رقم کے ذریعے مالی ضروریات پوری کرنے کے ساتھ ساتھ مختصر مدت کے نسبتاً مہنگے قرضوں کی جگہ طویل مدت کی فنانسنگ حاصل کرنے اور مستقبل میں قرضوں کی ادائیگی کے دباؤ اور ری فنانسنگ کے خطرات کو کم کرنے کی کوشش کی جائے گی۔
وزارت خزانہ نے اس اقدام کو پاکستان کی عالمی مالیاتی منڈیوں میں واپسی کی اہم کڑی قرار دیتے ہوئے کہا ہے کہ حکومت کا مقصد صرف نیا قرض حاصل کرنا نہیں بلکہ بیرونی فنانسنگ کے ذرائع کو متنوع بنانا، قرض کی مدت میں اضافہ کرنا اور مجموعی قرض پروفائل کو بہتر بنانا ہے۔
ماہرین کے مطابق تقریباً 6 ارب ڈالر کے آرڈرز کے مقابلے میں 3 ارب ڈالر کا اجرا عالمی سرمایہ کاروں کی پاکستان کے بانڈز میں نمایاں دلچسپی کو ظاہر کرتا ہے، تاہم یورو بانڈ ایک قرض ہے جس پر طے شدہ شرح کے مطابق منافع ادا کرنا ہوگا، اس لیے اس کے طویل مدتی مالی اثرات کا انحصار حکومت کی قرض مینجمنٹ اور معاشی اصلاحات پر ہوگا۔
💬 تبصرے (0)
اپنا تبصرہ لکھیں
ابھی تک کوئی تبصرہ نہیں۔ پہلے تبصرہ کرنے والے بنیں!